कीर्तन आणि प्रवचन ही एक प्राचीन सांस्कृतिक कला आहे. पूर्वीच्या काळी जेव्हा रेडिओ, दूरदर्शन, इंटरनेट नव्हते तेव्हा कीर्तनकार, प्रवचनकार, व्याख्याते हेच सामाजिक आणि सांस्कृतिक अभिसरणाची माध्यमे होती. त्यांच्याद्वारेच समाजाचे मानसिक, भावनिक, नैतिक आणि अध्यात्मिक पोषण होत होते. समाजव्यवस्थेचा रहाटगाडगा व्यवस्थित चालवण्यासाठी आणि समाजाचे नैतिक अधिष्ठान टिकवण्यासाठी कीर्तनकारांचे योगदान महत्त्वपूर्ण आहे. आता पुन्हा एकदा कीर्तनकारांना, प्रवचनकारांना चांगले दिवस येत आहेत. त्याला कारण आहे तंत्रज्ञान ! तंत्रज्ञानाच्या माध्यमातून आपली संस्कृती आणि परंपरा जगभर पोहोचवण्याची संधी कीर्तनकारांना आणि प्रवचनकारांना उपलब्ध झालेली आहे.